Pas ditësh të mbushura me ndjenja të forta, përqafime të sinqerta dhe emocione që vijnë bashkë me mallin për njëri-tjetrin dhe familjarët jashtë, ferma u gjallërua nga një moment i papritur dhe prekës. Një zhurmë droni u dëgjua sot mbi fermë, duke zgjuar menjëherë kureshtjen e të gjithë fermerëve, të cilët dolën jashtë për të parë se kujt i drejtohej kjo surprizë.

Këtë herë, droni ishte për Erandin, i dërguar nga miqtë e tij të ngushtë. Me një mesazh ku shkruhej:
“Mjeshtër në skenë, me ngjyra, nota dhe me penë.”
mesazhi nuk ishte thjesht një përshëndetje, por një vlerësim i sinqertë për talentin dhe shpirtin artistik të Erandit.

Ky moment ishte tepër emocional për Erandin, dhe ndjesitë iu lexuan menjëherë në fytyrë. Me një buzëqeshje të përmbajtur dhe sy të emocionuar, ai falënderoi nga zemra miqtë që e kujtuan me këtë gjest të veçantë.

Fermerët, të cilët kanë ndarë me të çdo ditë të këtij rrugëtimi, i qëndruan pranë, duke e përqafuar dhe përgëzuar për këtë moment të merituar.

Në këtë fund udhëtimi, ku çdo ditë është e mbushur me ndjenja të forta, kjo surprizë ishte një nga ato kujtime që do të mbetet gjatë në zemrën e Erandit  dhe të gjithë atyre që e përjetuan bashkë me të.