Puna në fermë vijon me ritëm dhe organizim nën drejtimin e kryefermeres së javës, Ester. Pas ndarjes së detyrave në orët e para të mëngjesit, Ester u sigurua që secili fermer të kishte një rol të qartë për të kontribuar në mbarëvajtjen e jetës së përditshme në fermë.

Fermerët nisën menjëherë me detyrat e tyre. Disa u angazhuan në stallat e kafshëve, ku u kujdesën për ushqimin dhe pastrimin e hapësirave, ndërsa të tjerë vijuan punët brenda fermës, duke sistemuar ambientet dhe duke kryer detyrat që kërkojnë përkujdesje të përditshme. Pas përfundimit të këtyre angazhimeve, djemtë e fermës Erandi, Andrea, Limi dhe Ylli u zhvendosën në një tjetër hapësirë pune: serat dhe tokat. Aty, ata u përfshinë në një nga proceset më të rëndësishme të mirëmbajtjes së fermës ujitjen e bimëve.

Përkushtimi i tyre tregoi seriozitetin me të cilin po trajtohen përgjegjësitë në këtë javë, ku Ester duket se ka sjellë qetësi dhe organizim. Nën udhëheqjen e saj, puna jo vetëm që është shpërndarë në mënyrë të barabartë, por edhe po realizohet me koordinim mes fermerëve. Ndërsa dita vijon, është e qartë se atmosfera në fermë është pozitive dhe energjia bashkëpunuese po dominon. Mbetet për t’u parë nëse ky ritëm dhe harmoni do të ruhet deri në fund të javës.