Një moment i ndjeshëm ka kapluar sërish fermën. Elinara është parë duke qëndruar e përlotur pranë dritares, teksa përjeton me emocion largimin e Dradanës. Ky nuk është thjesht një moment mallëngjimi, por duket si një shpërthim i akumuluar nga ngjarjet e fundit dhe tensionet që kanë mbizotëruar në fermë. Edhe këtë herë, pranë saj ka qenë Erandi  gjithmonë mbështetës, duke i qëndruar afër në një nga momentet më të vështira.

Më vonë, Elinara, Erandi dhe Big Basta janë mbledhur në dhomën e gjumit, ku nuk kanë munguar bisedat për raportet dhe situatat me fermerët e tjerë. Gjatë kësaj bisede intime, Erandi ka shprehur pakënaqësinë e tij në mënyrë të hapur. Ai ka theksuar se, edhe pse është artist, kjo nuk justifikon mungesën e respektit që ndjen se po i bëhet.

“Unë nuk do ta ul kurrë kokën përballë ofendimeve. Kjo gjë është e dhimbshme,” – është shprehur ai me ton serioz, duke theksuar se dinjiteti dhe respekti duhet të jenë për të gjithë njësoj, pavarësisht profesionit apo karakterit.

Ky moment i ngarkuar emocionalisht tregon tensionin që është shtuar ndjeshëm në javët e fundit brenda fermës, ndërsa dita e finales po afrohet dhe ndjeshmëria mes fermerëve është më e lartë se kurrë.