Pas fermerëve  të shtëpisë së fakirit, radhën për t’u zgjuar e kanë pasur fermerët brenda në fermë. Ditën e sotme, zgjimi ka nisur me Big Mama, e cila në rolin e kryfermeres së javës, ka marrë menjëherë frenat në dorë. Sapo është zgjuar, Big Mama është drejtuar në kuzhinë ku ndodhej fermerja Alba. Ajo i ka kërkuar që të përgatisë mëngjesin për të gjithë fermerët, një detyrë që Alba e ka marrë përsipër me përgjegjësi dhe përkushtim. Më pas, kryfermerja ka shkuar në dhomën e gjumit, ku pjesa më e madhe e fermerëve ende ndodheshin në gjumë. Me shumë kujdes dhe delikatesë, ajo i ka zgjuar një nga një, duke i thirrur me emër: “Anduel zgjohu, Keisi zgjohu…” një qasje që dëshmon lidershipin e qetë dhe organizimin e mirë të Big Mamës në këtë rol.

Gjatë procesit të zgjimit, Big Mama ka ndarë edhe detyrat për secilin prej fermerëve, duke u kujdesur që të gjithë të kenë një përgjegjësi të qartë për ditën. Ndërkohë që fermerët nisin ditën me përgatitjen e kafesë dhe rutinën e mëngjesit, Alba ka vijuar me gatimin për të gjithë fermerët, duke mbajtur gjallë shpirtin e bashkëpunimit  në fermë.  Duket sikur një tjetër ditë ka nisur në fermë me organizim dhe përkushtim  një shembull i mirë i menaxhimit dhe bashkëpunimit mes fermerëve.